首爾（二）：陳奶奶雞

位於東大門的這間陳奶奶雞，晚上非常多人。不過，其實大部份都是旅客。當晚坐在我們旁邊的，就是一枱日本客。我眼見旁邊的女生，每隻手指上起碼有三寸長的 gel 甲，但依然毫無難度、快速地玩緊 iPhone，邊影相邊upload上 Facebook，勁！咁多日本客，聞說是日系雜誌都有介紹。

坐入店裡，服務員便會自動拿上一個雞煲。裡面有一整隻雞、薯仔、蔥等配料。當隻雞煲到咁上下時，服務員會來幫你將隻雞剪成小塊，再加蒜、泡菜、年糕或麵等，再煲。我們的一個雞煲，另再加年糕，共 $19000 won。

話說我和黃大少見隻雞好似已經煲得差不多，便自己拿起剪刀，想將隻雞斬件。我們當然是雞手鴨腳啦，服務員見狀立刻出手，兩三下手勢立即將隻雞eleganly分成小件。

吃的時候，混上每桌上提供的醬油、醋、辣椒、芥末、蒜泥，很惹味。最正的是那個雞湯底，因為加了泡菜，所以有種酸酸辣辣的味道，冬天在這火爐前吃這個雞煲，一流！